Ինչպես օգտագործել ենթագիտակցությունը՝ կյանքը փոխելու համար

«Երբեք մի քնեք առանց ձեր ենթագիտակցությանը խնդիր տալու»:- Թոմաս Էդիսոն

Ձեր ենթագիտակցությունը սիրում է աշխատել, երբ ձեր մարմինը զբաղված է ուրիշ՝ հեշտ գործերով: Ես սա կարող եմ հեշտորեն ապացուցել, երբ հարցնեմ ձեզ, թե ինչքան լավ մտահղացումներ եք ունեցել մեքենա վարելու կամ ցնցուղ ընդունելու ժամանակ: Երբ դուք հանգիստ եք, դեռ մի փոքր էլ ցրված, ձեր միտքը ամենալավ վիճակում է:

Ենթագիտակցությանը խնդիրներ տալը կօգնի՝

• Բարելավելու ձեր մոտիվացիան
• Ձեզ ավելի երջանիկ զգալու
• բարձրացնելու ձեր զգացմունքային բանականությունը։

Դուք կտեսնեք տարբերությունը ոչ պակաս, քան մեկ ամսից:

Իմ վերջին խնդրանքն այս էր.
«Խնդրում եմ տուր ինձ համբերություն աշխատանքի գնալիս և թույլ տուր նույնիսկ վայելել իմ ժամանակը ավտոմեքենայումս»:
Առաջիկա ամսվա ընթացքում ես վայելում էի իմ աշխատանքի գնալը:
Իմ ամենավերջին խնդրանքն այս է.
«Եկեք գտնենք ստեղծարար ուղիներ իմ բլոգը զարգացնելու համար»:

Ես այս մոտեցումն եմ ընտրել, որովհետև սա կդիմի իմ ենթագիտակցությանն ու կգործի առօրյայում, որպեսզի դա իրականանա: Ընդամենը մի քանի օր առաջ եմ ես դա խնդրել, բայց արդեն աշխատում է: Փոխանակ մարդկանց խնդրեմ՝ քվեարկեն իմ բլոգի համար սոցիալական ցանցերում, որոնք գնահատել էին «Stumble Upon» և «Dig» հոդվածները, փոխեցի իմ շփման ձևը: Ես հիմա ինչ-որ մեկի ընկերն եմ, նրանց հաճոյախոսություններ եմ անում (միայն, եթե արժանի են) և ասում եմ, որ եթե երբևէ օգնության կարիք ունենան, ինձ անպայման հաղորդագրություն ուղարկեն: Նրանք շատ ավելի պատրաստակամ են օգնելու ինձ:

Մտածելակերպ
Իմ մտածելակերպը փոխվում է՝ ենթագիտակցությունս կոնկրետ հարցի շուրջ կենտրոնացնելով: Սկսում եմ տեսնել նոր անկյուններ, որոնք ես նախկինում երբեք չէի տեսել: Այս ենթագիտակցական խնդրանքները աշխատում են ոչ միայն անձնական հարցերում, այլ նաև աշխատանքի հետ կապված մտահոգությունների դեպքում:

3 քայլով խնդրանքը տևում է ընդամենը 5 րոպե:
1-ին քայլ
Մինչ լույսն անջատելը՝ փակեք ձեր աչքերը և մեկ րոպե մտածեք ենթագիտակցությանը տրվող խնդրի մասին: Դա կարող է լինել՝ ինչ պատահի: Ես կսկսեի քչից, այնուհետև կընդարձակեի այն: Ես չէի խնդրի, որ ամսվա վերջում տիեզերագնաց դառնամ: Ձեր ենթագիտակցությունը լավն է, բայց ոչ այդչափ:

2-րդ քայլ
Մեկ րոպե ինքներդ ձեզ համար պատկերացրեք, որ կարող եք անել այդ բանը: Անկախ նրանից ՝ դա աշխատանքի գնալուց առաջ վազելն է, թե առողջ սնունդ ընդունելը, դուք պետք է պատկերացնեք ձեզ այդ գործը կատարելիս, որը խնդրելու եք ձեր ենթագիտակցությանը: Ասենք թե, ցանկանում եք վազել աշխատանքի գնալուց առաջ: Պատկերացրեք ձեզ սովորականից մի քանի րոպե շուտ արթնանալիս, սպորտային հագուստ և կոշիկներ հագնելիս և մաքուր օդ դուրս գնալիս: Հետո սկսում եք վազել, դիտում եք արևածագը շենքերի վերևում, թռչունները երգում են, և դուք ձեզ հիանալի եք զգում:

3-րդ քայլ
Մեկ րոպե պատկերացրեք, թե ինչ զգացմունքներ կունենաք, երբ այդ նոր գործը կատարած լինեք: Ինչպե՞ս ձեզ կզգաք, երբ ետ գաք տուն առավոտյան վազքից հետո: Խանդավա՞ռ: Ինչ էլ ցանկանաք զգալ, տպավորություն կստեղծվի, որ արդեն առաջացրել եք այդ զգացմունքը ձեր ներսում: Թողեք այն խորանա, այնուհետև գնացեք քնելու և թույլ տվեք ձեր ենթագիտակցությանը անելու մնացած աշխատանքը:

Ձեր ենթագիտակցական միտքը ցանկանում է օգնել ձեզ՝ բարելավելու ձեր կյանքը. դուք պարզապես պետք է վստահեք նրա հսկայական ռեսուրսներին և թույլ տաք, որ անի իր գործը:

Աշխատանքը ձեր խնդրանքը իրական է դարձնում

Դուք միգուցե ցանկություն չունենաք վազելու ձեր առաջին ենթագիտակցական խնդրանքից հետո, բայց պատկերացրեք ձեզ այդ անելիս մոտակա 2 շաբաթների ընթացքում: Հետո պարզապես վերցրեք ձեր սպորտային պարագաները և գնացեք հինգ րոպեանոց զբոսանքի: Այս փոքր քայլերը ձեզ կտրամադրեն ձեր վազքի ռեժիմին: Մի քանի շաբաթ հետո պարզապես գնացեք վազելու: Այժմ, երբ դուք ունեք վազքին վերաբերող զգացմունքները, դրանք կառաջնորդեն ձեզ դեպի այդ գործողությունը:  

Թույլ տալով, որ զգացմունքային ազդակը գործի՝ դուք կստեղծեք դրդապատճառ, որը կօգնի իրականացնելու ձեզ երջանիկ դարձնող բաներ:

Թարգմանությունը՝ Նելլի Հարությունյանի

Աղբյուրը՝ www.thechangeblog.com